AI 生成藝術比賽 - 入圍作品

尺寸：

媒體/材料：AI 生成圖片

創作年份：2024

作品敘述：

拿，我地香港人，以前開口埋口都係獅子山精神，每個年代，每個時勢既獅子山精神都可能代表左唔同既信念，但我就相信，呢幅作品一定可以捕捉任何年代都岩用既「獅子山精神」。
.
呢個充滿張力既作品，正正展現左獨特既香港精神同果種堅毅不屈既工作態度。係一個風雨交間既早晨，身著西裝既打工仔，正係好努力咁跨過香港既地標- 獅子山！係咩驅使佢橫風橫雨都要返工？
.
睇吓天文台發出左幾多個警告先！紅雨?雷暴? 三號風? 唔理啦, 一日未黑雨, 未係八號風，我地都要係死線9:00前返到公司! 你睇下山壁上面閃住既「08:55AM」正正係號角既響起, 係獅子山後面係咩? 咪係IFC，打工仔既「聖殿」，雖然我就唔知佢係咪返IFC, 但係話知你係IFC 定KFC , 總之就算天崩地裂，打工仔都要準時返到工！獅子山精神吖嘛！你睇，雖然個天咁暗. 但係，唯有一輪明月(或者太陽啦)穿透烏雲，為呢個城市帶黎希望之光,呢個就係IFC, 提醒你繼續番工就有希望架啦! 
.
仲有, 你睇下幅相，佢趕住返工仲揸住部電話，好明顯係一路check緊老闆whatsapp, 一邊仲要預備今日個present ，為左番工你可以幾盡?

作品AI生成過程： 

喂！大家估下為咗呢張相我地做左幾多嘢先？首先我地真係諗住要認認真真咁做，所以特登訓練左個獅子山LORA出嚟 - 叻架！香港地標嚟架嘛，梗係要做到最好啦！
.
我地今次用既係高度模型化既Stable Diffusion圖形界面 - ComfyUI，再加埋由Stable Diffusion原班人馬喺black forest 訓練既flux dev模型。一開始我地就諗住要整到個香港打工仔既辛酸史，所以個prompt寫得都幾長下：
.
"A dramatic photograph of a single businessman in a drenched dark suit desperately running down Lion Rock's flooded stone steps during a violent typhoon..." 咁樣講梗係唔夠喇！我地仲加埋好多描述，要營造到個極端天氣既feel，好似The Day After Tomorrow咁，等張相睇落更加有衝擊力, 不過老實講, 出黎效果又唔係咁disaster, 但我就覺得算真實就收手。  
.
但係出完第一張底相之後仲未搞掂喎！我地要將IFC加落去先至夠香港feel！但係唔係咁樣就咁cut & paste咁簡單㗎！我地要做segmentation，將獅子山同個天分開，跟住將IFC加落去個陣要配合埋個天時昏暗既光暗位。仲要將denoise校低啲，等個氣氛更加match！
.
講開個「08:55AM」，我地都係要做晒segmentation，調光暗，做埋inpainting，等佢睇落自然啲。呢啲都係要花時間慢慢調教架！
.
總之呢張相唔係求其咁就整到出嚟架！背後真係用左好多唔同既AI技術，由LORA訓練到後期製作，樣樣都要諗計仔點樣配合。我地覺得咁樣做先至夠誠意，先至襯得起我地香港打工仔既拼搏精神啊！叻唔叻呀？